মুখ্য পৃষ্ঠা
06/04/2514:59
• স্বাগতম নৱবৰ্ষ •
আঘোণৰ পথাৰৰ কুঁৱলীৰ আচ্ছাদন ফালি
তুমি আহি শীতৰ লগতে
দুৱাৰত টোকৰ মাৰিলা ।
সময়ৰ বুকুত খামুচি
তুমি আহিছা যেতিয়া
তোমাক বাধা দিওঁ কেনেকৈ ?
সময়ৰ আঙুলিত ধৰি ভটিয়াই
যোৱা দিনবোৰে
তোমাক স্বাগতম জনাবলৈ উলটি নাহে,
উপহাৰ দি যোৱা দুখৰ ডায়েৰীত
স্বাক্ষৰ কৰি গ'ল মাথো
প্ৰতিশ্ৰুতিৰ অলেখ স্মৃতি ।
তোমাৰ আগমনত ফুলি উঠক
মোৰ দেশৰ পদূলিয়ে পদূলিয়ে
শুভ্ৰ শান্তিৰ ফুল ।
এজাক হিমচেঁচা বতাহ হৈ
চুই যোৱা মোৰ দেশ,
কঁপাই যোৱা দানৱৰ কলিজা ।
সৌ পদপথৰ সৰু সৰু নাঙঠ শিশুবোৰক
পাহৰি নাযাবা...
দি যোৱা এখন বস্ত্ৰ, এটুকুৰা ৰুটী;
বৃদ্ধাশ্ৰমত মৃত্যুৰ ক্ষণ
গণা বৃদ্ধা গৰাকীক
তুমি এবাৰলৈ মুখত দি যোৱা হাঁহি ।
বিধৱা আইৰ উকা ৰিহাৰ আঁচলৰ
জোতাৰ চিনবোৰ মুচি দিয়া,
পোনাকনক কোলাত লৈ জীয়াব দিয়া ;
এজাক ৰিমঝিম বৰষুণ হৈ
ধুই দিয়া ৰাজপথৰ কেঁচা তেজৰ দাগ ।
আইনৰ দেৱাল চিকুটি
লৈ আহা মানৱতা ।
পৃথিৱীৰ বুৰঞ্জীত তুমি পুণ্য হ'বা,
শান্তিৰ ইতিহাস তুমিয়েই ৰচনা কৰা ।
হেঃ নৱবৰ্ষ, তোমাক স্বাগতম…
তোমাক আদৰি আনিবলৈ
নাই মোৰ একোৱেই,
আছে মাথো দুটিমান অজলা শব্দ-
'তুমি আমাক শান্তি দিয়া
আমাক নকৈ জীয়াব দিয়া ।'
ණ ৰাজু কলিতা
